Во Центар „Јадро“ во Скопје вчера беше отворена фотографската изложба „Во меѓувреме, дојам“ на Драгана Николоска, која продолжува и денес, а ќе биде достапна за посетителите и утре. Изложбата се одржува по повод Светската недела на доењето и веќе на првиот ден привлече голем интерес меѓу љубителите на добрата фотографија.

Низ објективот на Николоска се доловени 13 мајки и нивните бебиња, но фокусот не е само на чинoт на доењето, туку на целото искуство – телесно, емоционално и општествено.

„Отворањето помина одлично – топло и со многу позитивна енергија. Имаше искрен интерес од посетителите за изложбата и за приказните зад фотографиите. Луѓето прашуваа, коментираа, се поврзуваа со темата. Посебно ми значеше што многу мајки се препознаа во моментите што ги доловив, а некои ми кажаа дека првпат гледаат ваква реална претстава на доењето“, изјави авторката Драгана Николоска за „Слободен печат“.

Таа имала можност да им се обрати на посетителите и да го објасни целиот процес – од идејата до реализацијата.

„Зборував за тоа како се роди желбата да ги доловам реалните моменти на мајките што дојат, за предизвиците при фотографирањето, и за важноста од нормализирање на доењето во јавноста. Споделив и колку бев изненадена од бројот на мајки што се пријавија да учествуваат и колку нивните приказни ме инспирираа да ја создадам оваа изложба“, додава Николоска.

По отворањето, многумина ѝ пријдоа со зборови на благодарност, велејќи дека за првпат некој искрено ја прикажал реалноста на доењето.

„Тоа за мене значи дека изложбата си ја исполнува својата цел – да допре, да отвори тема, и да не остави никого рамнодушен“, вели фотографката.

Изложбата „Во меѓувреме, дојам“ останува отворена до утре во Центар Јадро, а фотографиите се достапни и онлајн, на loveclick.mk.

Интервју со Драгана Николоска, фотографка: Фотографијата е моќ да ја зачуваме љубовта – секој момент со најблиските е бесценет