Пред неколку дена, во дворот на Министерството за култура, се случи впечатлив настан во чест на 80-годишнината од првиот истрел – Денот на народното востание на македонскиот народ, пренесува СДК.

Мултимедијалната програма беше збогатена со дел од глумците од, како што рече министерката за култура Ирена Стефоска, „ неповторливиот и поучен македонски филм ‘Истрел’ – филм инспириран од вистински настани за време на бугарската фашистичка окупација.

„Осумдесетгодишнината од првиот истрел за слобода е чин за длабока почит и длабок поклон. Отпор достоен за незаборав. Ова е најмалку што Министерството за култура може да го направи во спомен на оние кои со пушка ја создаваа, а потоа и ја одржаа националната култура жива, а со тоа, и сите нас нѐ одржаа во живот. Длабок поклон и почит за сите поети, писатели, сликари, глумци, музичари. На сите уметници кои се приклучија во Народно ослободителната и антифашистичка борба и ги запишаа, секој низ својот потпис, и болката и бесот и радоста и величественоста на партизанската одисеја. Со нас вечерва се дел и од наследниците на тие големи луѓе, антифашисти, кои знаеја колку се важни непокорот и слободата во битката и во закрепнувањето на татковината. Зборот е истрел, но и истрелот е збор“, кажа министерката, која е професорка на Институтот за национална историја при Универзитетот „Свети Кирил и Методиј“ во Скопје.

Студентите од ФДУ од класата на професорката Зоја Бузалковска изведоа мини – претстава со извадоци од Манифестот на АСНОМ на повеќе јазици, а ја „оживеаја“ песната за Стив Наумов од Сенка Велетанлиќ и Зафир Хаџиманов.

Писателката и професорка Калина Малеска – внука на истакнатиот македонски писател, општествено-политички работник, издавач и револуционер, автор на сценариото на првиот македонски филм „Фросина“, автор на текстот на македонската химна, Владо Малески – раскажа помалку познати факти за тоа како и каде настанала песната „Денес над Македонија“.

Во публиката беа присутни многу културни дејци, љубители на филмот, но и дел од глумците кои беа дел од „Истрел“.

„Македонската култура е многу поголема од нашата држава и од траењето на нашите животи. Јубилеите се тука  – да нѐ потсетат дека историјата се учи за да не се заборави, за никогаш да не се повтори“, рече министерката Стефоска.

Во прилог, погледнете го видеото и овој прекрасен мултимедијален настан: