Поп-ѕвездата Кристина Агилера се појави на доделувањето на наградите „Breakthrough Prize“ во Санта Моника и изненади со значително поинаков изглед, при што најголемо внимание привлече нејзината нова фризура, пренесува „Пејџ сикс“.

Таа носеше тесен црн кожен фустан со спуштени раменици, дело на дизајнерот Салих Балта, кој ја истакна нејзината фигура. Сепак, најзабележлива беше нејзината коса – краток боб, што претставува голема промена во однос на нејзината препознатлива долга коса.

Својот изглед го надополни со ланче со привезок, сребрени прстени и црни сандали со ремчиња. Шминката беше во неутрални тонови, со нагласени очи и сјајни усни, што придонесе за елегантен, но воедно и современ стил.

Нејзината трансформација предизвика бројни реакции на социјалните мрежи, каде што обожавателите коментираа колку изгледа поразлично, но и го пофалија нејзиниот храбар моден избор. Многумина забележаа дека Агилера во последно време сè почесто експериментира со својот изглед и стил, што дел го толкуваат како нова фаза во нејзината кариера.

На настанот таа пристигна со својот свршеник Метју Ратлер, со кого е во врска долги години, а заедно позираа пред фотографите на црвениот тепих.

Оваа гламурозна церемонија, често нарекувана „Оскари на науката“, собира познати личности и научници и доделува награди во износ од по три милиони долари за достигнувања во области како биологија, физика и математика.

Меѓу бројните познати гости беа и Роберт Дауни Помладиот, Марго Роби, Џон Леџенд и Бил Гејтс.

Настанот е основан од извршниот директор на компанијата „Мета“, Марк Закерберг, неговата сопруга Присила Чан, Јулија и Јуриј Милнер, Сергеј Брин и Ен Војџицки.