Познатата професорка по пеење и еден од нашите најдобри придружни вокали, Ана Костадиновска, замина на прекрасно женско патување во Италија. Дека „крушата под круша паѓа“ и дека уметничкиот ген едноставно не се прескокнува, докажува и друштвото со кое Ана ужива во убавините на Тоскана.

На ова патување таа е придружувана од двете најважни дами во нејзиниот живот: нејзината мајка, Кармен Костова , позната професорка по пијано во пензија, и нејзината ќерка Марта.

Низ серија фотографии на социјалните мрежи, насловени едноставно како „Bella Italia“, трите генерации покажаа како квалитетно се користи слободното време – шетајќи низ историските улици на Фиренца и позирајќи пред култната Крива кула во Пиза.

Ана и Кармен се директни чувари на македонското музичко богатство. Ана е ќерка на еден од најголемите македонски композитори, аранжери и диригенти, Кире Костов, кој остави неизбришлива трага во нашата забавна музика. По неговото заминување, неговото семејство со гордост и достоинство продолжува да го носи неговиот уметнички аманет со промоција на монографијата „Летај галебе“ во негова чест и истоимениот концерт кој се одржа лани во ноември во Националната опера и балет.

Ова патување и насмевките на нивните лица имаат уште поголема тежина ако се земе предвид низ каков животен период помина Ана изминатиов период. Таа е вистински синоним за храброст и преживеан борец, откако во март 2025 година во пожарпт во Кочанската дискотела „Пулс“ ги загуби своите колеги и пријатели од групата „ДНК“, за кои вели дека ѝ беа како семејство.

Ана оттогаш помина низ макотрпен процес на закрепнување. Но, нејзиниот ведар дух, љубовта кон музиката и, пред сè, безрезервната поддршка од мајка ѝ Кармен, ќерката Марта пријателите и учениците од „Илија Николовски-Луј“, беа нејзиниот најголем ветар во грб.