Васил Хаџиманов сподели приказна за својот покоен пријател Матија Дедиќ, чија загуба тешко ја поднесе.

На Матија Дедиќ на 2 март требаше да му биде роденден, па белградскиот џез-музичар со македонско потекло сподели нивна заедничка фотографија и напиша: „Среќен ти небесен, брате“. На фотографијата се Васил Хаџиманов со својата тетка Бисера Велетанлиќ и Матија Дедиќ со својата мајка Габи.

Хрватскиот музичар Матија Дедиќ почина на 53-годишна возраст на 8 јуни лани. Тој беше еден од најпочитуваните џез-пијанисти во регионот, син на музичките легенди Арсен Дедиќ и Габи Новак. Неговата мајка, Габи Новак, почина на 11 август лани, на 89-годишна возраст.

„Незамисливо е што повеќе те нема, што нема да те видам повторно, но ќе останам силна затоа што најмногу се восхитуваше на мојата сила. Секогаш зборуваше дека сум силна лавица, а ти емотивна риба“, напиша ќерката на Матија, Лу Дедиќ, по големата загуба и се потсети на заедничките моменти и на темите што ги поврзувале: астрологија, нумерологија, мистерии и теории на заговор.

„Тоа беа некои од нашите омилени теми, за кои разговаравме со часови во твојата кујна со кафе и цигари. Ти благодарам за сè, за твојата грижа, нежност и добрина, за животот што ми го овозможи и во текот на кој ме чуваше како капка вода на дланка, твојата единствена ќерка. Ќе ги остварам нашите соништа и ќе те направам горда, исто како што ти ме направи мене најгорда на светот“, напиша Лу Дедиќ.

На 19 јануари во Белград почина пејачката и актерка Сенка Велетанлиќ, сопругата на пејачот, композитор и актер Зафир Хаџиманов, на 89-годишна возраст.

„Утрово нѐ напушти мојата мајка Сенка Велетанлиќ, по тешка болест. Замина тивко, достоинствено, во сон, како дама, токму како што ѝ прилегаше. Те сакам, мамо. Ти благодарам, мамо“, напиша на социјалните мрежи нејзиниот син, музичарот Васил Хаџиманов.

„Љуби ме и главата горе“: Почина српската пејачка Сенка Велетанлиќ, сопруга и најголема љубов на нашиот Зафир Хаџиманов