ТВ-презентерката Татјана Стојановска имаше убав повод за славење во кругот на најблиските. Нејзиниот сопруг, Михаил Китановски, го прослави својот 55-ти роденден, а Татјана сподели дел од атмосферата со своите следбеници на социјалните мрежи.

Преку куси видеа и фотографии на својот инстаграм-профил, придружени со безвременските хитови “Happy Birthady“ на Лени Кравиц и „Forever Young“ на групата „Алфавил“, таа покажа како се славеше во еден скопски локал со жива музика, пријатели и роденденска торта со бројката 55.

Татјана и Михаил важат за еден од најскладните, но и најдискретните парови на македонската јавна сцена. Нивната љубовна приказна трае повеќе од една деценија. Иако со години живееја заедно, тие одлучија официјално да го кажат судбоносното „да“ во јуни 2023 година.

Нивната свадбена прослава беше организирана токму на десетгодишнината од почетокот на нивната врска. Во кругот на најблиските пријатели, колеги и семејството, парот направи убава забава во познат скопски ресторан каде што ја крунисаа својата долгогодишна љубов. Михаил, кој по професија е економски консултант и бизнис-аналитичар, и Татјана честопати во јавноста истакнуваат дека за нивната врска клучни се меѓусебното почитување, слободата и поддршката која си ја даваат во кариерите.

„Пред точно 10 години, на 10 јуни 2013 година, Михаил ме побара за жена на нашиот прв одмор во Грција, и тогаш по неколку месеци од запросувањето, почнавме да живееме заедно. И точно на 10-годишнината од запросувањето, стапивме и официјално во брак. Беше весело благодарение на групата ‘Соната’и бисерниот глас на Кате, како и на нашите весели гости“, рече пред три години Татјана за „Слободен печат“.