ФОТО | Стилот на Јованка Броз ги спои модните дизајнери од екс-ју земјите
Ревијата претставуваше омаж на ликот и делото на некогашната прва дама, а симболично се одржа на поранешниот Ден на републиката – 29 ноември.
Модната ревија „Јованка во боја“, инспирирана од ликот и делото на Јованка Броз, сопругата на доживотниот претседател на Југославија Јосип Броз Тито, се одржа во Палатата Србија, во рамки на манифестацијата Белградска модна недела, во организација на модното студио „Клик“.
На модната ревија беа претставени парчињата облека на 23 избрани дизајнери од Србија и другите републики на поранешна Југославија, кои покрај пристапот до архивите, имаа можност да користат и материјали кои Броз ги добиваше за време на нејзините патувања со Тито низ светот.
Јованка Броз, покрај југословенската мода и текстилната индустрија, соработувала со модниот салон Клара Ротшилд во Будимпешта, купувала облека и додатоци од модните куќи Диор, Ланвин, Балмен, Пјер Карден, Валентино и материјали од текстилните компании Маркото, Черути, Зења, Бјанкини-Ферер и на бројни патувања низ светот.
Разбивајќи го сивилото на источниот, социјалистички блок, Јованка вешто ги користела и интензивните и пастелните бои, а често и белата за да биде видлива. И кога беше опкружена со најважните личности од тоа време, таа се истакна, пленеше со својата убавина, држење, изглед и елеганција, приспособувајќи ја актуелната мода на нејзиниот стил и рачно изработената, уникатна облека.
На модната писта во улога на манекенка се појави и Ана Ѓуриќ – Констракта, српската претставничка на Евровизија.