Коул Томас Ален, мажот обвинет за обид за атентат врз американскиот претседател Доналд Трамп за време на гала-вечерата на Здружението на дописници од Белата куќа, се согласи да остане во притвор до почетокот на судењето. Ален, за време на краткото појавување пред судијката, не се изјасни за вина за нападот што го прекина еден од најистакнатите годишни настани во Вашингтон, пишува „Евроњуз“.

Пукање во хотелот „Хилтон“

Обвинителите тврдат дека Ален со недели го планирал нападот и преку интернет го следел движењето на Трамп, пред во саботата вечерта, со пушка во рака, да претрча низ детекторот за метал во хотелот „Вашингтон Хилтон“.

Во инцидентот бил повреден и самиот Ален, но не од огнено оружје. Еден агент на Тајната служба бил застрелан, но преживеал благодарение на панцирот.

Според наводите на обвинителството, се верува дека Ален барем еднаш пукал од својата ловечка пушка, додека агентот на Тајната служба испукал пет куршуми. Истражителите, меѓутоа, јавно не потврдиле дека куршумот што го погодил панцирот на агентот бил испукан од Ален.

Обвинителството: Нападот бил планиран

Во судските документи обвинителите навеле дека триесет и едногодишниот Ален се фотографирал во својата хотелска соба само неколку минути пред инцидентот. На фотографијата, како што тврдат, бил опремен со торба за муниција, футрола за пиштол преку рамо и нож во футрола.

Властите објавиле и порака, испратена до членовите на семејството непосредно пред пукањето, за која велат дека ги расветлува неговите мотиви. Во неа Ален себеси се нарекува „пријателски федерален убиец“ и индиректно се жали на низа потези на администрацијата на Трамп.

Одговарајќи на тврдењата на одбраната за недоследности во доказите, обвинителството во средата порача дека доказите покажуваат оти Ален пукал од ловечка пушка во насока на агентот.

„Обвинителството нема сознанија за какви било физички докази, видеоснимки или искази на сведоци што би биле спротивни на теоријата дека вашиот клиент пукал од ловечка пушка во насока на агентот, или на фактот дека агентот навистина бил погоден со куршум во градите додека носел панцир“, се вели во писмото на обвинителите.

Одбраната: Случајот се темели на претпоставки

Адвокатите на Ален инсистираат тој да биде пуштен на слобода. Во судските поднесоци тврдат дека случајот на обвинителството е „заснован на заклучоци за намерите на господин Ален кои отвораат повеќе прашања отколку што нудат одговори“.

Одбраната исто така истакнува дека Ален во своите пораки никогаш не го спомнал Трамп по име.

„Доказите на обвинителството за наводниот обид за атентат врз претседателот во целост се темелат на претпоставки, дури и според најблагото толкување на нивната теорија“, напишале адвокатите.

Му се заканува доживотен затвор

Ален во понеделникот, покрај обвинението за обид за атентат, беше обвинет и по уште две дополнителни точки поврзани со оружје, вклучувајќи и пукање од огнено оружје при извршување насилно кривично дело.

Ако биде осуден само по точката од обвинението за обид за атентат, му се заканува казна доживотен затвор.

ВИДЕО | Пукање на вечера на која бил Трамп – претседателот итно евакуиран, повреден таен агент

Доживотен затвор за Рајан Рут за обидот за атентат врз Трамп