Најблиските роднини, пријатели и соработници се испратија со актерот Метју Пери на приватен погреб на гробиштата Форест Лон во Лос Анџелес, САД.

На погребот присуствувале неговата мајка Сузан Морисон (84), неговиот очув Кит (76) и неговиот татко Џон Пери (82).

Неговите колеги од популарната телевизиска серија „Пријатели“ („Friends“), Џенифер Анистон (54), Лиза Кудроу (60), Кортни Кокс (59) и Дејвид Швимер (57) пристигнале заедно за да се збогуваат со својот пријател.

Гробиштата се спроти студиото „Ворнер Брос“, каде што култниот ситком се снимаше десет сезони, и е последното почивалиште на многу други починати ѕвезди.

Церемонијата завршила со изведбата на песната „Don‘t Give Up“ од Питер Габриел .

„Немаше суви очи. Имаше многу солзи и смеа. Зборуваа само блиските пријатели и семејството“, изјави извор за „Дејли мејл“.

По церемонијата, Пери бил погребан во темно дрвен ковчег, а присуствувало само семејството.

Не е познато дали Пери побарал црква за последното збогување или тоа било одлука на семејството. Исто така, не е познато дали ќе се одржи јавна церемонија за збогување со актерот.