Основачот на Си-ен-ен, Тед Тарнер, почина денеска на 87-годишна возраст. Тарнер остави неизбришлива трага во медиумскиот свет кога на 1 јуни 1980 година ја лансираше Си-ен-ен, првата телевизиска мрежа што емитуваше вести 24 часа дневно.

Бизнисменот роден во Охајо, познат по својата отворена природа и прекарот „Устата на Југот“, изгради огромна медиумска империја која вклучуваше популарни филмски канали, цртани филмови и професионални спортски тимови како Атланта Брејвс. Поради неговото влијание врз светските настани, списанието „Тајм“ во 1991 година го прогласи за „Човек на годината“.

„Тед беше интензивно вклучен и посветен лидер, бестрашен и секогаш подготвен да му верува на сопствениот суд“, рече Марк Томпсон, претседател и извршен директор на Си-ен-ен во соопштението објавено на Инстаграм. 

Покрај медиумите, Тарнер беше голем љубител на јахтите, голем филантроп и основач на Фондацијата на Обединетите нации. Како голем заштитник на природата, тој одигра клучна улога во враќањето на бизоните на американскиот Запад и го создаде цртаниот филм „Капетан Планета“ за да ги едуцира децата за животната средина.

Иако подоцна го продаде својот бизнис на „Тајм Ворнер“, тој секогаш истакнуваше дека Си-ен-ен е најголемото достигнување во неговиот живот. Во 2018 година, Тарнер откри дека боледува од деменција, а на почетокот на 2025 година беше примен во болница поради воспаление на белите дробови, по што беше на рехабилитација.