Светската хип-хоп икона Снуп Дог предизвика вистински делириум на овогодишниот „СинемаКон“ најавувајќи го биографскиот филм за својот живот кој со децении го чекаа милиони фанови. Раперот се појави на сцената во свој стил, изведувајќи ги хитовите како „Drop It Like It’s Hot“, но главната ѕвезда покрај него беше младиот актер кој ќе ја има честа да го портретира неговиот лик.

Снуп Дог потврди и на Инстаграм дека ликот на младиот Калвин Бродус Помладиот, неговото вистинско име, ќе го толкува Џонатан Дејвис, познат по улогата во „Нетфликс“ хитот „Outer Banks“. Зад режисерската палка стои Крег Бруер, додека сценариото го пишува Џо Роберт Кол, кој работеше на Марвеловиот блокбастер „Црн Пантер“.

„Моите браќа ја раскажаа својата приказна во филмот ’Директно од Комптон‘, а сега е ред на мене“, изјави Снуп, најавувајќи суров и искрен приказ на неговиот пат до врвот.

Совети за помладите фанови

Филмот ќе го следи неговиот подем во деведесеттите години, успехот со албумот „Doggystyle“ и соработката со Д-р Дре. Снуп со својот препознатлив хумор веќе ги предупреди помладите фанови дека филмот ќе има старосно ограничување поради експлицитните содржини.

„Барајте дозвола од родителите уште отсега, бидејќи ова нема да биде приказна за деца“, порача раперот.

Снимањето започнува ова лето во Лос Анџелес. Премиерата се очекува веќе следната година. Покрај филмот, Снуп по пауза од 29 години објавува и нов албум со наслов „Missionary“, на кој повторно соработува со легендарниот Д-р Дре.