Инспекциските служби на Општина Центар денеска започнаа со расчистување на два напуштени објекти на улиците „Тетовска“ број 20 во Ново Маало и „Владимир Полежиновски“ број 7, во близина на ТЦ „Буњаковец“, информираа од локалната самоуправа.

Од Општината велат дека оваа интервенција е извршена по пријава и барање на жителите од околните згради, кои се пожалиле дека имаат страв од пожари, кражби и загрозување на безбедноста и здравјето.

На првата локација, во близина на гимназијата „Раде Јовчевски – Корчагин“, со асистенција на полицијата биле иселени бездомните лица кои инспекторите ги затекнале во руинираниот објект, по што општинските служби започнале расчистување на сметот во и околу куќата.

Кај „Буњаковец“, пак, поради присуство на малолетни бездомни лица, во акцијата е вклучена и социјалната служба и по завршување на постапката, од Општината велат дека настанатата мини депонија целосно ќе се исчисти.

Од Општина Центар соопштија дека ова не е првпат инспекторите да реагираат по пријави за овие локации, но од самоуправата велат дека иако се чисти просторот, бездомни лица повторно го населуваат.

-И покрај претходните интервенции, бездомни лица повторно се вселуваат во напуштени објекти, користејќи го фактот дека станува збор за куќи со нерешени имотно-правни односи. Иако сопствениците се контактирани, поради недостиг на соодветна реакција, општината е принудена постојано да интервенира со цел заштита на јавната безбедност- се вели во општинското соопштение.

Градоначалникот на Општина Центар Горан Герасимовски посочи дека ваквите објекти во кои се собираат бездомници и се создаваат диви депонии претставуаат лоша слика за централното градско подрачје, но реална опасност за околината.

-Ги повикувам сопствениците да бидат одговорни, а граѓаните навремено да пријавуваат, за да можеме навреме и ефикасно да реагираме – порача Герасимовски.