Како мала ич не го сакав овој колач. Се нервирав дека ќе ми останат зрнца од макот (афионовото семе) по забите и некако не ми беше вкусен, не ми беше доволно „фенси“.

Е сега, по сто години :), кога и самата си правам колачи дома, најчесто за да имам нешто слатко, а да не е купечко, овој колач ми е онака, спомен од замрсените тетратки со рецепти на баба ми и мајка ми. Едноставен, лесен, вкусен. За со кафе и чај наутро, совршен. Па еве што ви треба за овој колач.

Потребни состојки:

3 јајца
200 гр шеќер,
1 ќесичка ванилин шеќер
150 мл јогурт
100 мл масло
1 ќесичка прашок за печиво
150 гр брашно
150 гр афионово семе (мак)
рендана кора од лимон
150 гр чоколада за готвење
50 гр путер за глазура

Подготовка:

Изматете ги пенасто јајцата со шеќерот, ванилиниот шеќер, јогуртот и маслото. Настрана во брашното измешајте го прашокот за печиво  и додајте го во изматената смеса, а потоа и афионовото семе и рендана кора од лимон. Добро промешајте го тестото и ставете го во намастен калап за печење. Печете околу 30 минути на 200 степени, а за да проверите дали е печено, можете со чепкалка да го боцнете, ако не остане трага на него – колачот е печен.

Штом ќе се олади, премачкајте го со прелив озгора од стопена чоколада со путер.

Уживајте!