Пребарувањата на „Најк Тек Флис“ (Nike Tech Fleece) тренерката на Гугл драстично пораснаа откако претседателот на Венецуела, Николас Мадуро, беше фотографиран во неа по апсењето.

Иако апсењето предизвика глобална политичка дискусија, корисниците на социјалните мрежи веднаш се фокусираа на неговата облека. Според Гугл Трендс (Google Trends), пребарувањето на поимот „Најк тек“ (Nike Tech) експлодираше откако американскиот претседател Доналд Трамп ја сподели фотографијата на својата платформа Трут Соушал.

Тренерката е дел од „Најк Тек Пак“ (Nike Tech Pack) колекцијата и е на продажба од 2013 година. Коментарите на социјалните мрежи се забавни и саркастични:

„Каква реклама за Најк!“

„Сопствениците на Најк со задоволство триеја раце“

„Оваа колекција е постара од брковите на Мадуро“

Инаку, Белата куќа, односно административниот тим на американскиот претседател Доналд Трамп, се обидува на секој начин да се потсмева на венецуелскиот претседател, а во оваа прилика споделија видео на официјалните канали. Имено, во снимка што трае околу 25 секунди, Белата куќа прикажа еден од претходните говори на Николас Мадуро во Венецуела, во кој тој директно им се обраќа на Американците.

„Дојдете да ме земете. Ќе ве чекам во Мирафлорес. Не чекајте долго, кукавици“, рече Мадуро за време на говорот.