ФОТО | Никогаш не е доцна: Пензиониран психијатар на 95 години стана магистер по филозофија
Пензиониран психијатар на 95 години го собори рекордот на Универзитетот Кингстон, како најстариот човек кој добил диплома на тој универзитет. Имено, д-р Дејвид Марџот го собори претходниот рекорд поставен во 1994 година, на студент кој дипломирал на 93 години, пишува „Би-би-си“.
Д-р Марџот, која стана магистер по модерна европска филозофија, вели дека студирањето било напорна работа за него, бидејќи неговата меморија не е како порано.
„Имав среќа да имам наставници од светска класа и тоа беше многу позитивно искуство. Мислам дека е важно секогаш да се предизвикувате себеси дури и додека стареете“, вели Марџот.
Тој го слушаше курсот за да го задржи својот ум окупиран со нови информации, откако починала неговата сопруга по 65 години заеднички живот. Д-р Марџот сега размислува да се пријави и за докторат со скратено време, кој би го завршил на 102-годишна возраст.
„Знаев дека сум ограничен со време, па кога видов оглас за курс што беше локален за мене, решив да се пријавам“, вели пензионираниот психијатар.
„Персоналот и студентите беа толку трпеливи кон мене. Тоа беше прекрасен курс… па, ми беше чест да ја добијам оваа диплома и да бидам дел од таков фантастичен универзитет“, додава тој.
Инаку, д-р Марџот, кој се квалификувал како доктор во 1952 година, вели дека влегувањето во образованието по неколку децении е „малку како коцкање, но ако сте заинтересирани, тогаш не се откажувајте“.
Д-р Стела Стенфорд која му предаваше на д-р Марџот и беше неговиот ментор на дисертацијата, вели дека Марџот имал славна кариера и поради тоа донел богато знаење и искуство со него во дискусиите на часовите.
„Знаеме дека различноста во училницата прави побогати и поинтересни дискусии и не смееме да заборавиме дека тоа ја вклучува и генерациската различност“, вели Стенфорд.
Д-р Марџот, кој живее во Сари, Југоисточна Англија беше придружуван од неговиот син и зет на церемонијата на дипломирање во театарот Роуз во Кингстон, Лондон.