Годинашното издание на Венецијанскиот филмски фестивал, инаку 81. по ред, беше отворено со премиерата на филмот „Битлџус Битлџус“ („Beetlejuice Beetlejuice“), а главна ѕвезда на црвениот тепих беше 21-годишната актерка Џена Ортега, која во филмот ја глуми Астрид Диц.

Ортега се појави во гламурозен црвен фустан со отворен грб, откривајќи ги нејзините нозе низ проѕирните набори. Фустанот, всушност, е омаж на познатата црвена венчаница која Винона Рајдер ја носеше во оригиналниот филм од 1988 година.

Младата актерка позираше и со Рајдер, ѕвездата на оригиналниот филм, која носеше фустан сличен на Ортега, само црн.

Ортега успеа да ја засени и прекрасната Моника Белучи, која во филмот ја игра Долорес, сопругата на Битлџус. Инаку, филмот го режираше партнерот на Белучи, Тим Бартон, а Битлџус го игра Мајкл Китон. На црвениот тепих се појавија и Кејт Бланшет, Тејлор Расел, Изабел Гуларт и Попи Делевињ.