Помладата ќерка на Моника Белучи и Венсан Касел, 16-годишната Леони, е новата ѕвезда на априлското издание на италијанскиот „Вог“. Ова е нејзиното прво појавување на насловна страница, каде позираше рамо до рамо со својата славна мајка, тргнувајќи по стапките на Моника и нејзината постара сестра Дева.

Едноставен стил и искрени емоции

На насловната фотографија, Леони изгледа природно и модерно во едноставна комбинација од црна кожена јакна и фармерки, надополнета со слушалки и очила за сонце. Младата Леони сама ги избрала парчињата облека кои најдобро го отсликуваат нејзиниот секојдневен стил, маици, фармерки и патики.

„Не очекував дека сè ќе се одвива толку брзо и сè уште не можам да поверувам дека ова ми се случува. Постојано си велев: ’Ова не е игра‘. Уживам во запознавањето нови луѓе и сакам да бидам во движење. Една од моите омилени фотографии е онаа каде што мајка ми и јас се шминкаме заедно“, изјави Леони за магазинот.

Моника Белучи за родителството: „Мора да го почитувате нивниот лет“

Италијанската дива во интервјуто отворено зборуваше за нивните семејни ритуали и блискоста со ќерките. Моника откри дека ужива во моментите кога Леони и Дева заедно се подготвуваат за излегување.

„Мора да ги почитувате вашите деца. Треба да сфатите дека во еден момент тие ќе пораснат и единствено што можете да направите е да се грижите за нивниот лет. А Леони веќе лета. Лета брзо бидејќи ја интересира животот“, вели гордата мајка, која својата помлада ќерка ја нарекува „дете на љубовта“.

Идол ѝ е сестрата Дева

Иако веќе е дел од светот на високата мода, 16-годишната Леони останува приземјена. Таа откри дека нејзиниот најголем идол отсекогаш била нејзината постара сестра Дева Касел, која веќе гради успешна кариера како модел и актерка.

Што се однесува до иднината, Леони има уште две и пол години до завршување на школувањето, по што ќе одлучи во кој правец ќе продолжи. Засега, покрај модата, покажува голем интерес за хуманистичките науки и сонува за далечни патувања, особено во Јапонија.