Кога модата ќе ги рашири своите крилја не само како уметност, туку со примат на добробит на задницата, тогаш и ќе ја покаже својата моќ. Тоа се случува и кај нас. „Мода со кауза“ е насловена третата хуманитарна модна аукција во Скопје во рамките на 31. Моден викенд Скопје, во организација на Конект.

Повеќе од 23 ѕвезди од модниот свет, еминентни дизајнери, звучни уметници и занаетчии ја покажаа својата великодушност и донираа парчиња.

„На аукцијата ќе можат да се купат дизајнерски парчиња од етаблираниот македoнски моден дизајнер Никола Булески, уникатен корсет од Никола Ефтимов, коктел-фустан од Лидија Георгиева, венчаница направена од Изет Цури, фустан од Силвија Михајловска, модна креација од брендот ‘Терзија’ (Terziya), мантил-фустан од Олгица Ѓорѓиева, комплет од Катерина Тошева, Билјана Силјановска, макси здолништа на Антонија Гугинска и креации на млади дизајнери од СКАЛА Академија за моден дизјан“, велат организаторите.

Покрај познатите дијзанери, учесниците ќе можат да надаваат и за уникатни дизајнерски парчиња, како и прекрасни изработки направени од инклузивни друштва.

„На тивката аукција ќе има дела од Ирина Тошева и согрѓанките со затворска казна во КПД Идризово кои создадоа дела под името ‘Направено во Идризово’ (Мade in Idrizovo), дела на ЕСНАФ – бренд што за занаетчиски техники ги вклучува лицата со попреченост, Буба Солак – вдахновена уметница на креации што носат порака и Маријана Јосифовска, дизајнерка на шапки“, откриваат организаторите за „Слободен печат“.

Мода и филантропија

Вкупната комерцијална вредност на дизајните е проценета на 170.000 денари, се очекува аукцијата да ја достигне најмалку оваа сума. Средствата одат за филантропски цели.

„Третата модна аукција е наменета за донации за филантропски фонд во земјава што поддржува граѓански организации. Сите коишто ќе купат нешто од оваа аукција ќе помогнат за заштита на шумите и урбани заедници од пожари, едукација на младите, инвестиција во развој на децата со попреченост со помош на технологија и ја помага првата ‘изнајмувачница’ на помагала за граѓани болни од рак – велат од Конект.
Приматели на донациите се доброволни противпожарни друштва, ИМКА Битола (непрофитна, невладина, нерелигиозна, инклузивна младинска организација ), здружението за асистивна технологија ‘Отворете ги прозорците’ и ‘Палиум’ (здружение за поддршка на Палијативните пациенти и нивните семејства).

Аукцијата е поддржана од Амбасадата на Франција во Скопје.