Неексплодирана артилериска граната од Првата светска војна утрово беше пронајдена во реката Вардар, објави Дирекцијата за заштита и спасување (ДЗС).

Гранатата, со калибар од 155 милиметри и тешка 45 килограми, била пронајдена во атарот на селото Пепелиште, близу Неготино.

„Поради непристапниот терен и локацијатa на неексплодираното убојно средство во коритото на реката Вардар, интервенцијата беше реализирана во сложени услови. Со логистичка поддршка од Територијалната противпожарна единица – ТППЕ Неготино, којашто обезбеди чамец за пристап до локацијата, а пиротехничарот на ДЗС, Ѓорѓи Стефанов, безбедно ја извлече гранатата, по што таа беше транспортирана и обезбедена до нејзиното конечно уништување на Армискиот полигон ‘Криволак’“, се наведува во соопштението.

ДЗС упати апел до граѓаните доколку пронајдат сомнителни експлозивни средства, да не ги допираат и поместуваат, туку веднаш да ги пријават на единствениот повикувачки бесплатен број за итни случаи 112.

Риболовот со магнет на татко и син заврши со откривање на минофрлачка граната од Втората светска војна