Оаза на мир и природна убавина, со единствен рекреативен комплекс со специфична боја на термална вода каква што ретко може да се види, се наоѓа на северот на Србија, на околу два часа возење од Белград.

Недалеку од Бачка Топола и Суботица се наоѓа термалната бања Пачир, која е единствена во овој дел од Европа и препознатлива по розовата боја на водата во езерото, пишува „Сити магазин“.

Комплексот на термалната бања во Пачир во последните години доби голема популарност токму поради својата розова вода, која на сонце добива нијанса на циклама, додека во сенка преминува во потемна виолетова нијанса.

Езерото е опкружено со уредена плажа со ситен чакал, покрај која се поставени лежалки и чадори за сонце. Има и маси и столици под настрешници, а во задниот дел се наоѓа голема зелена површина наменета за сончање на трева.

Комплексот располага и со два затворени базени со термална вода, што ја прави бањата погодна и за посета во зимските месеци.

Водата извира од длабочина од околу 1.400 метри под земјата и на изворот достигнува температура од околу 72 степени Целзиусови, но додека стигне до површината постепено се лади, па во езерото изнесува околу 30 степени.

Оваа вода содржи висока концентрација на натриум-хлорид, па затоа не е само топла, туку и солена, што ѝ дава својства кои се сметаат корисни за здравјето.

Според составот на водата, бањата има добиено сертификат за лековитост. Се смета дека топлата солена вода помага во одржување на здравјето и придонесува за зајакнување на имунитетот. Исто така, постојат тврдења дека водата има корисно дејство кај кожни заболувања, ревматски проблеми и состојби по повреди.