Кралската ковница на пари на Велика Британија одлучи да му оддаде почит на Фреди Меркјури, фронтменот на рок-групата „Квин“, со нови монети на кои е прикажан неговиот лик, за кои сестрата на музичарот рече дека многу би му значеле, пренесуваат странските медиуми.

Новите монети го прикажуваат харизматичниот музичар како настапува, со неговиот потпис. Кралската ковница на пари соопшти дека деталите на монетите, преку внимателно осмислен дизајн, зборуваат за извонредниот талент на Меркјури.

Вокалниот опсег од четири октави на пејачот е претставен со музичка партитура со линија што ги поврзува најниските и највисоките ноти, а работ на монетите е инспириран од металната алка што Меркјури ја носеше за време на неговиот настап на „Лајв Еид“. Некои од примерите се во боја, оживувајќи ја познатата жолта јакна на музичарот и неговата жива енергија.

Новата монета беше лансирана во годината што ја одбележува и 40-годишнината од концертот „Лајв Еид“ во 1985 година, како и објавувањето на соло албумот на Меркјури „Mr Bad Guy“.

Монетите се достапни за продажба на веб-страницата на Британската кралска ковница од вторник – најевтината чини 18,5, а најскапата дури 9.350 фунти.