Пејачката Ана Костадиновска објави што ќе се случува вечерва на шоуто „Златна бубамара на популарноста“, во салата „Борис Трајковски“ од 20 часот.

Во Скопје пристигнаа членовите на британската соул, фанк и диско група „Делегејшн“, која остави неизбришлив белег на музичката сцена во 1970-тите и 1980-тите во Европа и САД. И токму од пробата со „Делегејшн“ во Националната опера и балет, Костадиновска објави слика и напиша дека таа ќе ги пее придружните вокали заедно со Ана Петановска и со Та Богатинова. Своите колешки, Ана ги нарече „прекрасници“. На сликата со неа се и Ранко Петровиќ, сопственикот на радио „Бубамара“, како и Калиопи и Слаткаристика кои исто така ќе пеат на шоуто.

Слики со „Делегејшн“, но и со соул-кралицата Марта Хај, долгогодишен придружен вокал на Џејмс Браун, објави и џез-гитаристот Владимир Четкар кој исто така би требало да настапи на „Златна бубамара“.

Инаку, ова ќе биде 29. издание на популарното шоу кое годинава е под мотото „Апсолутна власт, апсолутна забава“. Групата „Делегејшн“ ќе ја добие наградата за животно дело како и Марта Хај. Марта Хај (81) ја нарекуваат соул-божица и е најпозната по 32-годишната соработка со легендарниот Џејмс Браун како негов прв придружен вокал. Таа настапувала и со Литл Ричард, Џери Ли Луис, „Темптејшнс“, Арета Френклин, Б. Б. Кинг, Стиви Вондер, Принс, Мајкл Џексон, „Полис“ и многу други.