ФОТО: Абази има цела галерија со функционери на ДУИ, а тврдеше дека нема контакт со никого од партијата
Новоизбраниот шеф на Обвинителството за гонење на организиран и криминал и корупција, Ислам Абази, денеска за првпат се појави во јавност, порачувајќи дека ќе работи професионално. На прашањето за негова наводна блискост со ДУИ, тој одговори дека не е близок со Али Ахмети, иако се од исто село, како и дека нема никаква врска со партијата. Но, тој рече и дека нему како обвинител не му е забрането да се дружи ниту со некој од ДУИ, ниту пак со други.
Но, само неколку часа подоцна, се појавија низа фотографии на кои се гледа Абази во дружење и неформална атмосфера со истакнати функционери на партијата. На една од фотографиите Абази е со поранешниот градоначалник на Гостивар и долгогодишен член на ДУИ, Невзат Бејта.
На друга фотографија, Абази е во лов на диви свињи со обвинителот од скопското Вишо обвинителство, Дилавер Бектеши. Бектеши во јавноста е познат по случајот со двајцата поранешни функционери на ДУИ, Ејуп Алими и Исмет Гури, во кој одлучи на двајцата да им се вратат пасошите во текот на постапката, во која беа осудени на казна затвор од три и пол години за уништување на изборен материјал на локалните избори во 2013 година во Чаир за да победи ДУИ.
Новиот шеф на Обвинителството за гонење организиран криминал и корупција во неговото прво јавно појавување посочи дека тој со неговото досегашно работење не оставил простор да има впечаток дека тој има релации со политичка партија.
„Не е точно“, рече Абази прашан дали има блиски релации со Али Ахмети.
Сепак, на една од фотографиите кои се појавија во јавноста, новиот обвинител кој треба да ја предводи борбата против корупцијата и криминалот во земјава, е сликан во опуштена атмосфера со братот на лидерот на ДУИ, Фикри Ахмети.
Прашан дали можеби се сретнал со Али Ахмети, бидејќи е негов соселанец од Зајас, Абази одговори: „Можеби и сме се сретнале“. Тој негираше дека има лични контакти.
Абази вчера беше избран за наследник на Вилма Русковска на чело на ЈО ГОКК, а изборот за првпат се спроведуваше со директно гласање на сите обвинители во државата. Неговиот избор беше експресно поздравен од заменик-министерот за правда, Агим Нухиу.