Фондот за здравствено осигурување и Природно-математичкиот факултет потпишаа договор со кој генетски анализи за онколошки заболувања ќе почнат да се изведуваат во лабораторијата за молекуларна биологија и геномика при ПМФ, а трошоците ќе ги покрива Фондот.

Со ова, пациентите со рак ќе добиваат побрза и попрецизна дијагноза, преку новата технологија за генетско секвенционирање (NGS), што овозможува лекарите да ја одберат најефективната терапија според генетските карактеристики на туморот.

Директорот на ФЗО, Сашо Клековски, истакна дека целта е да се намалат долгите листи на чекање за онколошки анализи и да се забрза почетокот на лекувањето. Очекувањата се во 2025 година да се направат околу 1.500 вакви анализи, за онколошки и ретки болести.

Покрај тоа, лабораторијата ќе служи и како практична база за студентите  – идни генетичари, кои ќе имаат можност уште за време на студиите да работат со најсовремена опрема.

Клековски најави и воведување на предимплантациска генетска дијагностика (ПГД), анализа која досега не се работеше во земјава, а се користи при ин-витро постапки за утврдување дали ембрионот е здрав. Оваа услуга треба да ја зголеми успешноста на ин-витро обидите и да придонесе за раѓање здрави деца.

Деканот на ПМФ, Даворин Трпески, истакна дека факултетот првпат во својата 80-годишна историја директно се вклучува во здравствениот систем, а вложените јавни средства преку Министерството за образование и наука сега ќе се вратат кај граѓаните преку здравствени услуги.

– За тоа да се случи, морам да кажам дека три точки се многу битни во целата работа. Првата е одличната соработка што ја имавме во изминатиот период со Министерството за здравство, каде што ги препознаа нашите капацитети и изготвија решение за да се вклучиме во здравствениот систем на Македонија, при што лабораторијата за молекуларна биологија и генетика, всушност, ја доби таа акредитација. Втората работа е тимот што работеше, како и вработените на ПМФ, кои интензивно работеа во изминатиот период за да може да создадат услови за сето тоа да биде подготвено како што треба – истакна Трпески.

Лабораторијата се очекува да започне со работа веднаш по завршувањето на техничките подготовки и набавката на потребните материјали.