Фил Џонс и Туанзебе си одат од Манчестер јунајтед, преговори со Де Геа за нов договор
Манчестер јунајтед информираше дека разговорите остануваат отворени со шпанскиот голман Давид Де Геа околу потенцијален нов договор.
Искусниот чувар на мрежата ги брани боите на Манчестер јунајтед од сезоната 2011/2012. Со клубот успеа по еднаш да ги освои Премиер лигата, ФА купот и Лига Европа, двапати Лига купот, а трипати ФА Комјунити Шилд.
Како што беше најавено минатиот месец, централниот бек Фил Џонс ќе го напушти клубот после 12 години и 229 настапи за „црвените ѓаволи“.
На Џонс одамна не сметаа во клубот, играше за резервниот тим, иако и таму беше повреден. Практично не играше посериозен фудбал повеќе од три години.
Од „Олд Трафорд“ си заминува и дефанзивецот Аксел Туанзебе после 37 настапи за првиот тим.
Туанзебе најмногу го паметат по настапот против Килијан Мбапе во 2019 година, кога Јунајтед го елиминираше ПСЖ од Лигата на шампионите.