Фестивалот „Крик“ ќе претстави практика на отпор и општествена преобразба преку „Театарот на угнетените“
Здружението на граѓани „Контрапункт“ и фестивалот за критичка култура „Крик“ организираат настан посветен на „Театарот на угнетените“ на Аугусто Боал – театарска и општествена практика која го спојува уметничкото дејствување со борбата за правда, солидарност и помирување. Настанот ќе се одржи на 26 декември (петок), со почеток во 19 часот, во КСП „Центар-Јадро“ во Скопје.
Препорачано
Преку примери, практични интервенции и разговор, ќе се отвори простор за размислување за театарот како алатка за отпор, за јавно преиспитување на угнетувањето и за создавање можни алтернативи во реалниот живот. Театарот овде не е само претстава, туку процес – „проба за реалноста“ во која гледачите стануваат активни учесници.
Настанот отвора простор за заедничко промислување и дејствување околу теми што често остануваат невидливи или маргинализирани во јавниот дискурс, како што се:
– Родовото насилство како тивка последица на политичко-општествените конфликти, особено во периоди на транзиција и криза, кога насилството се нормализира, економската несигурност расте, а траумата се пренесува во секојдневниот живот;
– Замолчувањето на женските искуства во процесите на справување со минатото, каде страдањето и активната улога на жените ретко се признаени, а недостасуваат родово чувствителни архиви, истражувања и јавни политики;
– Потребата од интерсекциски и транс-етнички пристап во помирувањето, кој го препознава родовото и семејното насилство како системски, а не приватен проблем, и отвора простор за солидарност и заедничко дејствување надвор од етничките и општествените поделби.
Режисер и водител на настанот (Џокер) е Зоја Бузалковска. Во процесот играат Александар Степанулески, Ангела Пејковска, Лора Штарго и Мартин Мазнев. Визуелните интервенции се на Ѓорѓе Јовановиќ, додека технички продуцент е Павле Игновски.
Настанот е наменет за сите кои веруваат дека уметноста и културата можат да бидат средство за општествена преобразба, заедничко учење и колективно дејствување. Настанот е организиран во соработка со Форум цивилен мировeн сервис „ПроПис“ – Северна Македонија.
