Четвртото издание на интермедијалниот фестивал „Арт ареа“ годинава го смени местото на одржување, и место во сега непостоечкиот простор на „Кино Култура“ се одржува во новоотворената кафе-книжарница „Буква“. Фестивалот беше отворен на 14 мај со изложба на фотографии од Јелена Белиќ, видеопромоција на „Пансион“ од Пјотр Пажињски и „Чекајќи го Боџенглс“ од Оливие Бурдо, како и со промоција на книгата „Турнеја“ од Сашо Огненовски, на која промотор беше Владимир Мартиновски. Фестивалот трае три дена, од 14 до 16 мај, во организација на издавачката куќа „Бегемот“.

– „Арт ареа“ е интермедијален фестивал што ја поттикнува и промовира современата парадигма на интегративно и интерактивно културно дејствување. Фестивалот ја пресретнува градската потреба за формирање и одржување зони на пресек на различните културно-уметнички полиња, во поглед на авторската работа и на рецепцијата на публиката, трудејќи се да воспостави силна и плодотворна врска меѓу одделните „соби“ на културата. Со тоа, како фестивалски тим сакаме да направиме видлив исчекор кон вмрежувањето на културната сцена и да ја поткренеме свеста за нејзината разнообразност, но и за можностите таа да прави нови и неочекувани преплети преку конкретни изведби, публикации, поставки и експерименти.

Фестивалот е особено насочен кон откривањето на новото во урбаната култура и се труди да воспостави платформа за иновативно делување што потенцијално би ги збогатило културните содржини во градот и би привлекло нови учесници во живата градска култура. Годинава „Арт ареа“ се одржува во дворот на кафе-книжарницата „Буква“ во центарот на Скопје, а на наше задоволство, оваа година фестивалот го препознаа и го поддржаа „Креативна Европа“, Министерството за култура на Северна Македонија и Градот Скопје, што е доказ за важната позиција што ја изгради во културната сфера – истакнува Филип Димевски, уредник на издавачката куќа „Бегемот“.

Според програмата, на 15 мај ќе се одржи Базар на ракотворби на Македонското студентско етнолошко друштво (МСЕД) и социјалното претпријатие „Еснаф“, во 18 часот следува промоција на „Непозната Македонија“ од Васко Марковски, со модерирање на Александра Јуруковска, а во 20 часот ќе се одржи ВИС Тркалезна маса и поетско читање на младите поети на „ПНВ Публикации“ (Андреј Ал-Асади, Викторија Ангеловска, Димитар Арнаудов, Павлина Атанасова, Ива Дамјановски, Диме Данов, Ивана Јовановска, Благица Трајкоска, Исток Улчар, Љубица Шопова).

Во недела програмата почнува со „Сказнувалка“ и видеопромоции на книги за деца, во 18 часот е промоцијата на книгата „Скопскиот дервиш“ од Виктор Трајановски, додека во 20 часот ќе почне проекцијата на македонски кратки играни филмови 2019-2020 („Ќе му се јавам на татко ти“, Леон Ристов; „Farmer’s Blues“, Ибер Деари; „Вера“, Верица Недеска; „Без љубов“, Дина Дума).

(Текстот е објавен во „Културен печат“ број 80, во печатеното издание на „Слободен печат“ на 15-16 мај 2021)