Во примерокот од мусаката што се служела во првата смена во основното училиште „Димо Хаџи Димов“ во скопската населба Влае, утврдено е присуство на грам-негативни бактерии од групата Enterobacteriaceae. Според Институтот за јавно здравје (ИЈЗ), истиот тип фекални бактерии биле откриени и на три чешми во училиштето.

Од ИЈЗ информираат дека непосредно по денешната прес-конференција, пристигнал нов лабораториски резултат кој ја потврдил контаминацијата во прехранбениот примерок. Дополнително, материјали и примероци за анализа продолжуваат да пристигнуваат, а бројот на досега земените е значителен, велат од ИЈЗ.

Оттаму не го посочуваат конкретниот вид бактерија откриена во храната, од инаку големото наведено семејство бактерии, од кои некои се безопасен дел од цревната флора, а други можат да предизвикаат тешки труења, како салмонела и шигела.

Случајот се дозна во средата, кога голем број ученици од училиштето наеднаш пријавија стомачни тегоби, а повеќе деца завршија на болничко лекување. Меѓу децата кои беа примени во болница беше и помалиот син на премиерот Христијан Мицкоски, Антониј.

Резултатите од дел од земените мостри се очекува ИЈЗ да ги соопшти до крајот на денот.

Мицкоски: Син ми е храбро момче, не е точно дека бил во многу тешка состојба