Иако Евровизија ќе се одржи дури во мај оваа година, обложувалниците веќе ги објавија првите прогнози, според кои Израел моментално е водечки фаворит за победа – иако сè уште не е познато кој ќе ја претставува земјата на музичкиот натпревар.

Како што објави специјализираната страница „Еуровижн ворлд“ (Eurovision World), Израел во моментов има околу десет проценти шанси за победа.

Зад Израел следуваат Шведска со осум проценти, Украина со седум, Финска со шест, Италија со четири проценти, како и неколку други земји со помали изгледи.

Познато е дека Шпанија, Словенија, Ирска, Холандија и Исланд се откажаа од учество на Евровизија, поради одлуката Израел да добие дозвола за натпреварување.

На минатогодишниот натпревар, претставничката на Израел, Јувал Рафаел, со песната „Ќе изгрее нов ден“ (New Day Will Rise), освои прво место во гласовите од публиката, а на крајот заврши на второто место во вкупниот пласман.

Од оваа година важи и ново правило за гласање – публиката ќе може да гласа најмногу 10 пати, за разлика од досегашните 20 гласа.

Јубилејното, 70. издание на Евровизија ќе се одржи во салата „Винер Штатхале“ (Wiener Stadthalle) во Виена. Првото полуфинале е закажано за 12 мај, второто за 14 мај, додека големото финале ќе се одржи на 16 мај. На натпреварот ќе учествуваат 35 земји.