Европското првенство ќе се игра само во една земја!?
Коронавирусот драстично ги промени плановите на УЕФА кога е во прашање организирањето на следното Европско првенство. Истото годинава требаше веќе да биде завршено, но поради пандемијата на коронавирус е презакажано за наредната 2021 годинa (11 јуни-11 јули).
Во меѓувреме светските медиуми шпекулираат дека можно е ЕП наместо во повеќе градови ширум Европа, да се игра во само една земја.
Како потенцијален организатор на овој настан се одвојува Русија која ги има сите услови за одржување на Европското првенство, барем така информира францускиот „Ле Паризиен“
Потсетување дека доколку нашата селекција триумфира против Грузијците, автоматски ќе биде сместена во групата „Ц“ со Холандија, Украина и Австрија. Како што е најавено мечевите од оваа група ќе се играат во Букурешт и Амстедам.
Потоа, групата „А“ (Турција, Италија, Велс, Швајцарија) во Рим и Баку, групата „Б“ (Данска, Финска, Белгија, Русија) во Копенхаген и Ст. Петерсбург, групата „Д“ (Англија, Хрватска, Чешка, Србија/Шкотска) во Лондон и Глазгов, групата „Е“ (Шпанија, Шведска, Полска, Северна Ирска/Словачка) во Даблин и Билбао, и групата „Ф“ (Португалија, Франција, Германија, Унгарија/Исланд) во Будимпешта и Минхен. Ваквата идеја да се игра во повеќе градови дојде со цел да се прослави 60 години постоење на еврошампионатите.
Претседателот на УЕФА, Александар Чеферин пред две недели најави дека можно е ЕП да се одржи во пет, три или само една земја.
Русија успешно пред две и пол години го организираше Светското првенство, а нејзината предност воедно е и тоа што ситуацијата со коронавирусот е многу подобра во однос на останатите држави каде што треба да се организира Европското првенство.