Европскиот суд пресуди во корист на ромски пар од Србија – биле изложени на полициска тортура
Европскиот суд за човекови права во Стразбур пресуди во корист на ромска брачна двојка кои биле мачени во полициска станица во 2017 година откако пријавиле кражба на автомобил, објави денеска Европскиот центар за правата на Ромите, пишува Нова.рс.
Препорачано
Владата на Србија има три месеци да ја спроведе пресудата и да им исплати на Марко и Сандра Сталовиќ нематеријална штета во износ од 7.500 евра (3.750 евра по подносител на барањето).
На 1 јуни 2020 година, Вишиот суд во Белград им досуди нематеријална штета: 4.700 евра на Марко Сталовиќ за трпење дискриминација, физичка болка и страв и 1.700 евра на Сандра Сталовиќ за трпење дискриминација и страв.
Европскиот центар за правата на Ромите во соопштението наведува дека Марко и Сандра Сталовиќ биле задржани со часови во полициската станица во Белград, каде што полицијата „го мачела сопругот, расно ја навредувала сопругата и им се заканувала дека социјалната служба ќе им ги одземе децата“.
„Судот утврди дека српската полиција дискриминирала ромска двојка, го подложила Марко на тортура и нечовечко и понижувачко постапување и дека не спровела ефикасна истрага за злосторствата извршени против двојката“, се додава во соопштението.
Судот пресуди дека овие повреди на правата се директна последица од дискриминацијата врз основа на етничката припадност на двојката, што, според Европскиот центар за правата на Ромите, е „ретко во случаи на полициска бруталност“ поради товарот на докажување врз жртвата и потребата од високо ниво на докази.
Правниот советник за човекови права во Европскиот центар за правата на Ромите, Андреа Чолак, изјави дека оваа пресуда потврдува дека кривично-правните механизми на Србија, вклучително и Уставниот суд, „целосно не успеаја да обезбедат правда за Ромите жртви на полициска бруталност“.
„Речиси девет години подоцна, ниту еден полицаец не се соочил со последиците од своите постапки. Она што го прави овој случај особено трогателен е фактот дека Марко и Сандра самите се јавиле во полицијата за да го пријават кривичното дело. Тие му верувале на системот, а таа доверба била искористена против нив“, додаде Чолак.
