Европската Унија објави оглас за преведувачи на македонски јазик
На веб-страницата на Европската Унија објавен е повик за професионални толкувачи на македонски јазик кои ќе бидат ангажирани во Европскиот парламент, Европската комисија или Европскиот суд на правдата. По тој повод, вицепремиерот за европски прашања Бојан Маричиќ ги повика сите заинтересирани македонски толкувачи да се пријават на огласот и „со тоа да придонесат кон професионално толкување и промоција на македонскиот јазик низ институциите на Европскaта Унија“.
– Преведувачките служби на ЕУ го отворија повикот и организираат тестирања за акредитација на конференциски толкувачи со македонски јазик (МК) како А-јазик -напиша Маричиќ на социјалните мрежи.
Повикот кој е објавен на веб-страницата на ЕУ е отворен до 19 јануари идната година.
Објавувањето на огласот е уште една потврда за меѓународното признавање на македонскиот јазик во рамките на европските институции.