Хрватскиот ракометар Игор Карачиќ (35), кого македонската јавност го знае добро од настапите во Вардар (2012-2019), е со својата репрезентација на Европското првенство во Германија каде се подготвува за настап во Главната фаза, а во првиот дуел игра со Франција во вторник (18 ч).

Карачиќ е задоволен од досега прикажаното од Хрватите и има „рецепт“ како да се спротивстават на олимпискиот шампион.

– Против Французите мораме да играме „на нож“. Почнавме добро на турнирот, но кога ќе го погледнете, тоа е само вовед и добра увертира за она што ни претстои. Секој натпревар е како финале, нема лесен противник. Нашата група е неверојатна, но со нетрпение ја очекувам. Така треба да биде Европското првенство – вели Карачиќ, а пренесува „индекс.хр“.

Хрватска и Словенија се единствените репрезентации од нашиот регион што се пласираа во Главната фаза. Прелиминарната фаза, покрај Македонија, не успеаја да ја минат ни Србија, Црна Гора, Босна и Херцеговина, Грција, Романија.