Скандалот со таканаречените досиеја „Епстин“ неочекувано ја зафати и Словачка, откако новообјавени е-пораки во средата открија поврзаност меѓу осудениот сексуален престапник Џефри Епстин и поранешниот словачки министер за надворешни работи, Мирослав Лајчак, кој денес е висок советник на премиерот Роберт Фицо, објави „Јурактив“.

Досиејата содржат илјадници документи што ја опишуваат криминалната мрежа на Епстин и неговите врски со глобални политички, бизнис и академски елити. Епстин , осуден сексуален насилник кој се самоуби во затвор, беше обвинет за трговија со млади девојки. Во средата демократите од Комитетот за надзор во Претставничкиот дом на САД објавија нови е-пораки, меѓу кои и оние во кои се споменува американскиот претседател Доналд Трамп.

Според кореспонденцијата, Епстин го спомнувал Лајчак во повеќе пораки, опишувајќи го како личност со „меѓународно влијание“. Лајчак, денес словачки дипломат и советник на премиерот Роберт Фицо за Западен Балкан, е поранешен министер за надворешни работи (2009–2010, 2012–2020), претседател на Генералното собрание на ОН (2017–2018) и специјален претставник на ЕУ за дијалогот Белград–Приштина (2020–2025).

„Трамп знае за девојките“ – демократите објавија нови детали за врската меѓу Епстин и американскиот претседател

Во една е-порака од 2019 година, Епстин го претставува Лајчак на ненаведен контакт како актуелен словачки министер за надворешни работи, претседател на ОССЕ, поранешен претседател на Обединетите нации и „најважно од сè – пријател“.

Тој го нарекувал Лајчак и со блискиот словачки прекар „Миро“, што упатува на лична блискост. Во друга комуникација од 2018 година, објавена од словачките медиуми, Епстин напишал дека „Миро доаѓа во Палм Бич“ – алузија на една од неговите резиденции на Флорида – „за стратегизирање“.

Словачките медиуми забележаа во петокот дека документите не содржат докази дека Лајчак знаел или бил вклучен во криминалните активности на Епстин. Но, тие упатуваат дека Епстин го сметал за сојузник во меѓународните дипломатски кругови.

Мејловите, исто така, покажуваат дека Епстин имал интерес и за словачката политика. Тој коментирал за оставката на тогашниот премиер Роберт Фицо во 2018 година по убиството на истражувачкиот новинар Јан Куцијак, а подоцна ја критикувал изборната победа на проевропската претседателка Зузана Чапутова во 2019 година – пишувајќи дека Лајчак „би бил подобар кандидат“.

Словачките медиуми побараа коментар од Лајчак и од словачкото Министерство за надворешни работи, но засега нема одговор.

Скандал со американскиот амбасадор во Турција – Епстин побарал да му испрати фотографија од дете