Осудениот педофил Џефри Епстин во приватни пораки тврдел дека Доналд Трамп „знаел за девојките“, според демократите во Комитетот за надзор на Претставничкиот дом, објави Си-ен-ен.

Во пораки кои првпат се објавуваат, Трамп се споменува во разговор меѓу Епстин и еден од неговите соработници од кругот на актуелниот американски претседател.

„Демократите во Комитетот за надзор на Претставничкиот дом добија нови е-пораки од имотот на Џефри Епстин кои покренуваат сериозни прашања за Доналд Трамп и неговото познавање на ужасните злосторства на Епстин“, рекоа демократите во објава на социјалните мрежи. „Видете ги сами. Време е да се стави крај на ова прикривање и да се ОБЈАВИ ДОСИЕТО.“

Една од пораките се однесува на директна преписка меѓу Џефри Епстин и Гислен Максвел.

Во е-поштата што Епстин ја испратил до Максвел во април 2011 година пишува: „Сакам да разберете дека кучето што не лаеше беше Трамп… (Жртвата) помина часови во мојата куќа со него… никогаш не е споменато. Шефот на полицијата… итн.“

Максвел одговара: „Размислував за тоа…“

Една од пораките датира од 2019 година и ја испратил Епстин до американскиот новинар Мајкл Волф. Во пораката пишува дека Трамп „знаел за девојките затоа што ја замолил Гислејн да престане“.