Едно лице загина, а 18-годишно момче е тешко повредено во сообраќајната несреќа што се случи денеска околу 14 часот на експресниот пат Штип – Велес, кај крстосницата за селото Иванковци.

Како што објави МИА, според информациите од Министерството за внатрешни работи, во несреќата учествувале два автомобила, а увид на местото извршила екипа на СВР Штип, со присуство на противпожарна екипа од Велес.

Од Итната медицинска помош при Здравствениот дом Велес информираат дека биле повикани во 14:20 часот и за неколку минути пристигнале на местото на настанот.

„Кај едниот возач, повозрасен маж, констатиравме смрт на самото место. 18-годишното момче од Струмица беше со повреди на карлицата, десното колено и главата, но беше свесно и контактибилно“, изјави д-р Елена Најдовска.

По укажаната прва помош, повреденото момче е пренесено во Ургентниот центар во Општата болница Велес.

Според Автомотосојузот на Македонија (АМСМ), сообраќајот на овој патен правец е во прекин во двете насоки додека трае увидот.