Хрватската фудбалска репрезентација го заврши настапот на Светското првенство по поразот од Португалија со 2:1 во осминафиналето. По натпреварот, најмногу внимание предизвикаа неколкуте спорни судиски одлуки – од поништените голови на Кристијано Роналдо и Петар Сучиќ поради офсајд, до погодокот на Јошко Гвардиол за 2:2 во длабокото судиско продолжение, кој по ВАР-проверката исто така беше поништен.

За судиските одлуки и улогата на ВАР се дебатираше ширум светот, а на социјалните мрежи се огласија и бројни познати личности кои го следеа натпреварот.

Меѓу нив беше и британскиот актер Хју Лори, најпознат по улогата на доктор Хаус во серијата „Д-р Хаус“ (House).

„Тоа беше вистинско лудило. Лука Модриќ е фудбалски џин“, напиша Лори на социјалната мрежа Икс.

That. Was a humdinger. Luka Modrić is a giant.

— Hugh Laurie (@hughlaurie) July 3, 2026

Неговата објава предизвика голем број реакции, а многумина во коментарите се согласија со пофалбите за капитенот на хрватската репрезентација.

Во дискусијата се вклучи и поранешниот светски шампион во шах, Гари Каспаров, кој денес е еден од најпознатите руски опозициски политичари.

„Навистина трагично, каков крај. Сите мои симпатии за оваа феноменална хрватска репрезентација. И мојата кариера беше обележана и поразена од компјутер!“, напиша Каспаров.

Со оваа порака тој се пошегува на сопствена сметка, алудирајќи на фактот дека голот на Јошко Гвардиол беше поништен откако технологијата во топката регистрирала допир од Игор Матановиќ. Токму тој податок им овозможил на судиите да го потврдат офсајдот и да го поништат погодокот на Хрватска.

Каспаров потсети и на еден од најпознатите моменти во својата кариера. Во 1997 година го загуби легендарниот шаховски дуел против суперкомпјутерот „Дип Блу“ на ИБМ и стана првиот актуелен светски шампион во шах кој бил поразен од компјутер во меч одигран според стандардните правила. Тој дуел и денес се смета за една од најзначајните пресвртници во историјата на шахот и развојот на вештачката интелигенција.