Шпанецот Андрес Уртадо пронашол слика оставена на улица и ја зел,бидејќи му се допаѓала нејзината рамка, но подоцна се покажало дека е многу вредно уметничко дело, пишува „Гардијан“.

Мистеријата на малата и многу вредна слика од шпанскиот уметник Хоакин Сороља, која исчезнала за време на викендот, е решена откако Уртадо ѝ кажал на полицијата дека ја помешал сликата со ѓубре кога ја нашол на улица во Севиља, но ја спасил затоа што навистина му се допаднала рамката.

Она што Уртадо не го знаел кога наишол на делото е дека станува збор за слика од Сороља, познат шпански уметник од крајот на 19-ти и почетокот на 20-ти век, и дека долго време била во сопственост на семејство кое ја носело со себе на одмор.

Çerçevesini beğendi, ünlü İspanyol sanatçının ‘çalınan’ eserini sokaktan kurtardıhttps://t.co/69vc9Tn4BC

— T24 (@t24comtr) July 2, 2026

Семејството имало намера да ја спакува сликата во багажникот на својот автомобил додека тргнувале, но случајно ја оставиле потпрена на ѕидот и си заминале.

Додека сфатиле што се случило, сликата ја немало, и покрај тоа што поставиле постери со кои барале информации за да им помогнат да најдат „слика со голема сентиментална вредност“, без да го споменат името на Сороља или вредноста на сликата.

Потоа, Уртадо, кој живее во Мурсија, ја пронашол сликата додека бил во Севиља со своето семејство за време на викендот и претпоставил дека некој ја фрлил.

– Ја зедовме поради рамката, а не поради сликата – изјавил тој за „Радио Севиља“.

Откако ја вратил во Мурсија, почнал да ја истражува сликата користејќи вештачка интелигенција и открил дека нејзиниот автор може да биде Сороља.

Уртадо се јавил во аукциската куќа во Мадрид и им испратил снимки од сликата, по што тие многу брзо му одговориле, велејќи дека станува збор за оригинално дело од Сороља.

Времето поминато со сликата вредна до 150.000 евра било краткотрајно, бидејќи кога стигнала веста за изгубената слика за која се вели дека е украдена, тој знаел што треба да направи.

– Веднаш се јавив во полиција и им кажав дека веста не е вистинита – рекол Уртадо.

Тој им објаснил на полицајците дека не ја украл сликата, туку дека само ја зел од улица.

Полицијата сега ја врати сликата на семејството од Севиља, кое му вети на Уртадо „мал подарок“ како знак на благодарност.

Како што потсетува „Гардијан“, ова не е првпат во последните неколку месеци вредно шпанско уметничко дело да има проблеми при транспортот.

Во октомври минатата година, полицијата започна потрага по мало дело со мртва природа на Пикасо вредна 600.000 евра откако исчезна на пат од Мадрид кон изложба во Гранада.

Сликата беше пронајдена три недели подоцна, откако полицијата откри дека никогаш не го напуштила Мадрид и дека случајно ја зел еден од соседите на нејзиниот сопственик, кој ја помешал со заборавен пакет и ја однел на безбедно.