Аргентинецот Франко Џиролами од македонскиот „ПСС Рејсинг Тим“ е вицешампион оваа ТЦР сезона. Викендов на првата трка во Барселона, Шпанецот Микел Азкона триумфираше и ја обезбеди титулата во ТЦР Европа 2021 кај возачите.

Неговиот главен конкурент за врвот Џиролами имаше проблеми во квалификациите, па започна од долниот дел на гридот. Се соочи со технички проблеми и заврши на 17 место на трката, а в недела ќе има шанса за поправање на впечатокот.

Неговиот тимски колега, македонскиот возач Виктор Давидовски беше на 11 позиција на трката, а моментно е на 16 место во генералниот пласман.

Како што известуваат од тимот, саботниот ден беше дефинитивно „игра на судбината“.

– Ја вложивме сета енергија и го дадовме максимумот во припремите, но некои нешта беа едноставно надвор од наш дофат. Дефектот од изутрината, како и поништувањето на најбрзо извозените кругови од Давидовски и од Џиролами, беа пресудни за резултатите на квалификациите.

Консекутивно и врз исходот од првата трка, одлучувачка за титулата на сезоната. Честитки до Микел Азкона и неговиот тим „Волкано“ за успехот – информираат од „ПСС Рејсинг Тим“.

Останува да се одржи и денешната последна ТЦР трка, втора во Барселона која ќе стартува од 13.45 часот.