Две измени на Тодоров, против Италија ќе дебитира Савиќевиќ
Со двајца од тројцата најмлади во тимот, Теодор Симиќ и Лука Савиќевиќ, ќе истрча денеска Македонија на дуелот со селекцијата на Италија.
Селекторот Александар Тодоров се реши да ги стави во ростерот за, и тоа како, важниот натпревар од кој ни зависи и судбината околу евентуалниот настап на наредниот Евробаскет во 2022 година.
За разлика од Симиќ, кој беше дел од селекцијата на првиот натпревар против Италија, ова е прва можност за Савиќевиќ, да биде дел од 12. кошаркари на сениорската репрезентација на еден официјален натпревар, откако првите две средби на националниот тим ги проследи од трибините.
Во тимот ќе биде и Дамјан Стојановски, кој на мечот со Русија се здоби со повреда на скочниот зглоб на левата нога. За среќа, не толку сериозна, што го става искусниот бек во стартните пет и за овој втор дуел против Италија на теренот во Арената „Молот“ во Перм.