Државниот санитарен и здравствен инспекторат (ДСЗИ) денеска спроведе вонреден инспекциски надзор во кавадаречката болница, по наредба на министерот за здравство, а во врска со третманот и лекувањето на двомесечното доенче У.М., кое почина на 14 јануари на Одделот за педијатрија.

Од ДСЗИ информираат дека во моментот е во тек патоанатомска обдукција, по чиј завршеток ќе биде утврдена точната причина за смртта. Од увидот во медицинската документација е констатирано дека двомесечното бебе, било донесено во болницата на 12 јануари со упат од матичен лекар поради чести повраќања и поспаност.

Двомесечно бебе починало во болницата во Кавадарци

-При приемот, детето било прегледано од специјалист педијатар, биле назначени биохемиски испитувања и поставена дијагноза гадење и повраќање. Доенчето било без покачена телесна температура, со стабилна сатурација и реагирало на дразби, по што била вклучена инфузиона терапија и исхрана со адаптирано млеко – се вели во соопштението.

Според ДСЗИ, на 13 јануари здравствената состојба била стабилна.

-На 14 јануари бил повторен лабораторискиот наод на урина со уредни резултати, а при визитата во 15:30 часот состојбата повторно била оценета како стабилна. Подоцна истата вечер, во 20:48 часот, било пријавено дека доенчето не дише, по што веднаш биле преземени реанимациски мерки од педијатар и анестезиолог, кои траеле околу 40 минути, но без успех – додаваат од ДСЗИ.

Како основна причина за смрт, во извештајот на анестезиологот е наведена „ненадејна смрт на доенче“. Случајот бил разгледуван и на стручен колегиум, како и од Комисијата за квалитет, а ДСЗИ најави дека ќе иницира формирање комисија за стручен надзор при Министерството за здравство.