Актуелниот македонски шампион, фудбалскиот клуб Шкендија денеска објави дека нов играч на екипата е 25-годишниот дефанзивен играч за врска, Дрилон Ислами. Официјално потпиша договор кој го обврзува со Шкендија во следните 2,5 години.

Косовскиот интернационалец ја започна својата професионална кариера во Дрита и во периодот од 2019 до 2023 година запиша 43 настапи и еден гол. Со Дрита беше шампион на Косово во сезоната 2019/20.

Потоа, се пресели во редовите на Феризај, а од 2023 до 2025 година беше дел од Приштина со 62 настапи и три погодоци. Со Приштина успеа да дојде до пехарите во косовскиот Суперкуп (2023) и националниот Куп минатата сезона.

На 2 јуни 2025 година го облече дресот на романскиот клуб Клуж.

Шкендија по есенскиот дел во шампионатот моментно е на третата позиција со 36 бодови, зад водечкиот Вардар (42) и второпласираната Струга (41).

Тетовските „црвено-црни“ испишаа историја во својата дебитантска сезона во Конференциската лига на УЕФА. Го освоија 22 место во лигашкиот дел и обезбедија пласман во плеј-офот, а таму ќе играат против Лех од Полска или Самсунспор од Турција. Ждрепката за двојките е закажана за 16 јануари 2026. Натпреварите ќе се играат на 19 и 26 февруари.