Во 2018 година, Полска, во потрага по американска воена база, го нарече својот предлог „Тврдина Трамп“. Минатата година, по потпишувањето на мировниот договор во Белата куќа, Ерменија и Азербејџан ја нарекоа новосоздадената сообраќајна врска „Трампова рута за меѓународен мир и просперитет“, пишува „Њујорк тајмс“.

Но, веројатно најнеобичниот обид за користење на името на претседателот Доналд Трамп за геополитички цели не беше познат на јавноста досега. Како дел од мировните преговори во последните месеци, украинските претставници предложија дел од регионот Донбас, за кој Русија сè уште се бори, да се нарече „Дониленд“.

Необичен предлог

Овој прекар го потврдија четворица запознаени со преговорите, кои инсистираа на анонимност. Според нив, кога украинскиот преговарач првпат го спомена името, делумно на шега, тоа беше обид да се охрабри администрацијата на Трамп посилно да се спротивстави на руските територијални претензии.

Можеби изгледа бизарно што се предлага име што потсетува на Дизниленд за опустошен дел од украинската земја на јаглен и челик, додека продолжуваат најсмртоносните борби во Европа од Втората светска војна. Сепак, тоа ја одразува и глобалната реалност во која владите се обидуваат да играат на картата на суетата на Трамп за да ја привлечат американската моќ на своја страна.

За Украина, тој напор сè уште не се исплати. Името сè уште се користи во преговорите, иако не е познато дали е евидентирано во официјални документи. Преговарачите, исто така, ја споменаа можноста „Трамповиот мировен комитет“ да има улога во управувањето со таа област, но според четири извори, ниту Русија ниту Украина сè уште не се согласиле на тоа.

Преговорите во втор план

Сепак, Русија не се согласи на договор што би бил прифатлив за Украина. Тоа ја остави судбината на областа што Украинците предложија да ја нарекуваат Дониленд – долга околу 80 километри и широка 65 километри – една од главните точки на спор во преговорите.

Разговорите за Украина во последните недели се ставен во втор план, додека врвните американски преговарачи, Стив Виткоф, близок пријател и специјален пратеник на Трамп, и Џаред Кушнер, зет на претседателот, се фокусираа на војната со Иран. Украинскиот претседател Володимир Зеленски изјави дека наското очекува посета на Виткоф и Кушнер.

Креативни детали

„Дониленд“ беше еден од начините на кои Украинците се обидоа да го натераат Трамп да заземе поцврст став на нивна страна. Откако Трамп се сретна со Путин во Алјаска минатиот август, неговата администрација сигнализираше дека можеби ќе поддржи мировен договор со кој Украина би се повлекла до административната граница на регионот Донецк, една од покраините во Донбас.

Еден украински преговарач, користејќи го Чет-џи-пи-ти дури и дизајнираше знаме за „Дониленд“ – во зелена и златна боја – како и национална химна, изјави запознаен со украинските преговарачки стратегии. Не е познато дали американските преговарачи некогаш дознале за тоа.

„Откажете се од Донбас и ќе бидете безбедни“ – Зеленски го откри тајниот предлог од Трамп