Дончиќ и Словенија останаа без медал
Кошаркарската репрезентација на Австралија го освои бронзениот медал на Игрите во Токио откако во натпреварот за третото место со 107:93 ја совлада Словенија.
Словенечките кошаркари постојано беа во негатива и успеваа да се вратат во игра, но не можеа да го запрат Пети Милс. Бекот на Австралија и на Сан Антонио спарс одигра неверојатен натпревар, постигна 42 поени и имаше девет скокови. Добра партија имаа и Џо Инглс со 16, Џок Лендејл со 14 и Данте Ексум со 12 поени. Кај селекцијата на Словенија прво име беше Лука Дончиќ со 22 поени, осум скокови и седум асистенции, Клемен Препелиќ даде 18 поени, а Мајк Тоби 13 поени.
Првото полувреме помина во израмнета игра на двете репрезентации, за во финишот од втората четвртина Австралија ги искористи грешките на противникот и дојде до предност од осум поени (53:45). Второто полувреме помина во обидите на Словенија да се врати во игра, но Австралија на спротивната страна го имаше Милс кој не дозволи комплетен пресврт и ѝ го донесе бронзениот медал на својата репрезентација.