Белгиската фудбалска репрезентација и покрај ремито на гости со Казахстан (1:1), во вторник на 18 ноември на домашен терен, има шанса со победа над Лихтенштајн официјално да стане учесник на Светското првенство во 2026 година.

Белгијците беа фаворитите за првото место и пред стартот на квалификациската група Ј во која настапува и македонската репрезентација.

Со доста голем број на ѕвезди во тимот, членот на Манчестер сити, Жереми Доку е еден од клучните играчи, но по мечот истакна дека Белгија мора да биде поефикасна во нападот и дека со вакви перформанси тимот нема да стигне далеку на Мундијалот.

– Испуштивме премногу бодови затоа што не игравме доволно добро во повеќето од нашите натпревари. Нашиот настап во овие квалификации, благо речено, не беше одличен. Сите треба да се подобриме – тренерот, јас, сите. Го анализиравме тимот на Казахстан и очекувавме да играат со долги топки, но бевме изненадени – противникот се потпираше на кратки топки и агресивна игра. Беше сосема различен натпревар од претходниот. Можеби не го анализиравме противникот доволно добро.

Отсуството на повредените Кевин Де Брујне, Ромелу Лукаку и Тибо Куртоа не може да биде изговор. Ако ни требаат за да го победиме Казахстан, тогаш ништо нема да направиме на Светското првенство – рече Доку.