Попладнево стигнала дојава за поставени бомби во основните училишта во скопската општина Аеродром, како и во повеќе школи во Куманово. Откажани се сите активности на децата во втората смена, како и тренинзи на клубови, играорни групи и други активности за кои се изнајмуваат салите и атриумите на училиштата.

„Денеска (28.10.2025) околу 18 часот во СВР Скопје и СВР Куманово било пријавено дека на е-поштенските адреси на неколку основни училишта пристигнале пораки со закана за поставени експлозивни направи“, соопшти МВР.

Според информациите од Министерството за внатрешни работи, веднаш по пријавите се постапува по протокол, а во тек се проверки од страна на полициските службеници.

Екипи на полицијата се на терен и ги прегледуваат училиштата со цел да се утврди веродостојноста на заканите и да се обезбеди безбедноста на учениците и наставниот кадар.