„Зимското јајце“ од куќата „Фаберже“, направено од кристал и дијаманти за руската владетелска фамилија пред да биде соборена од револуцијата, ќе биде понудено на аукција, а се очекува да достигне цена од 26,4 милиони долари.

Аукциската куќа „Christie’s“ соопшти дека „Зимското јајце“ е само едно од седумте раскошни овални фигури кои останале во приватна сопственост. Јајцето ќе биде понудено на продажба во седиштето на „Christie’s“ во Лондон во вторник.

Јајцето високо 10 сантиметри е изработено од прецизно изрезбан планински кристал, прекриено со деликатен мотив на снегулка од платина и 4.500 ситни дијаманти. Се отвора и открива малечка корпичка со скапоцени камења украсена со кварцни цветови кои симболизираат пролет.

„’Зимското јајце‘ е извонреден пример за занаетчиство и дизајн, „Мона Лиза“ за декоративната уметност“, изјави Оганесиан.

Ова јајце се смета за едно од најизвонредните дела на куќата „Фаберже“ и доколку достигне цена над 26 милиони долари, ќе постави нов светски рекорд за „Фаберже“ предмет продаден на аукција – трет пат „Зимското јајце“ го постигнува овој рекорд. Царот Николај втори го подарил како велигденски подарок за својата мајка.

Истото јајце претходно било продадено во 1994 година во Женева и во 2002 година во Њујорк – и два пати поставило рекорд, а во 2002 година достигнало цена од 9,6 милиони долари.

Аукцијата е закажана за 2 декември 2025 година во аукциската куќа „Christie’s“, како централен настан во рамките на нивната серија „Classic Week“ аукции.