Поранешната потпретседателка на Венецуела, Делси Родригез, денеска положи заклетва во Националното собрание и формално ја презеде функцијата привремен претседател на државата, пренесува Ројтерс.

Родригез положи заклетва пред својот брат Хорхе Родригез, кој на истата седница беше избран за претседател на Националното собрание со големо мнозинство гласови.

За време на церемонијата, Делси Родригез изјави дека ја презема функцијата „со болка поради страдањата нанесени на венецуелскиот народ од нелегитимната воена агресија против нашата татковина“. Таа ги нарече Николас Мадуро и неговата сопруга „херои“ и вети дека ќе го гарантира „духовниот, економскиот и социјалниот мир на нашиот народ“.

Делси Родригез важи за една од најблиските сојузнички на Мадуро. Таа ја извршуваше функцијата потпретседател од 2018 година, а претходно беше и министерка за економија и финансии.