Сите репрезентативци на Хрватска го одработија последниот тренинг и се подготвени за натпреварот против Аргентина во полуфиналето на Светското првенство во Катар.

Денеска од 20.00 часот на стадионот во Лусаил ќе се игра првиот полуфинален меч, „гаучосите“ го бркаат шестото, а „коцкестите“ второто финале на Мундијалите.

Најважната вест за Хрватска е дека сите играчи тренираат, што на прес-конференцијата го соопшти и нејзиниот селектор Златко Далиќ.

– Имаме сила, имаме енергија, тоа не е спорно. Знаеме дека ќе дадеме сè од себе, имаме добра ситуација во тимот, немаме големи проблеми, сите се здрави и подготвени – изјави Далиќ.

Далиќ не би требало да има премногу дилеми околу составот. На голот, во одбраната и средниот ред не треба да има изненадувања. Прашање може да биде позицијата десно крило, дали како и против Бразил ќе стартува Марио Пашалиќ или Никола Влашиќ. Предност во нападот најверојатно ќе му се даде на Андреј Крамариќ, освен доколку Далиќ не се реши за Бруно Петковиќ, стрелецот против Бразил во четвртфиналето.

Можниот состав на Хрватска против Аргентина:

– Ливаковиќ; Соса, Гвардиол, Ловрен, Јурановиќ; Ковачиќ, Брозовиќ, Модриќ; Влашиќ (Пашалиќ), Крамариќ (Петковиќ), Перишиќ.