Црна Гора: Марковиќ тврди дека Кривокапиќ нема визија за предизвици
Црногорскиот премиер во заминување, Душко Марковиќ тврди дека Здравко Кривокапиќ, кој се смета за нов премиер, нема визија да се соочи со предизвиците и на граѓаните веќе им навестува тешки времиња.
Кривокапиќ и претходно изјави дека државната каса е толку празна што се поставува прашањето дали ќе има средства за исплата на плати и пензии во ноември.
– За време на кампањата, повторував дека платите, пензиите и социјалните надоместоци по изборите не само што редовно ќе се исплаќаат, туку нема да бидат ниту намалени. За жал мандатарот кој се најавува, нема визија да се соочи со предизвиците и на граѓаните веќе им најавува тешки времиња, напиша Марковиќ на својот профил на Твитер.
Црногорската Влада на Твитер напиша дека и во тешка ситуација успеале да обезбедат плати, пензии и социјални трансфери.
– Многу земји се наоѓаат во неволја, како Влада мора да реагирате секој ден, соопшти црногорската Влада.